Kung may isang bagay na lubhang kinasusuklaman ang isang artist, ito'y ang katotohanan na kailangan din niya ang pera. Ang katotohanan na maging ang isang manlilikhang-sining, na may kimkim, sariling pagtuturing na isang diyos, ay gaya rin ng isang karaniwang mortal na kailangang kumain upang ang katawan ay hindi takasan ng kaluluwa.

Oops! Muntik na siyang may makabungguan sa mga kasalubong. Naiwasan niya sa huling sandali. Nilingon niya. Taong grasa. Tulad niya, naglalakad nang parang wala sa sarili. Mula sa mga de-kurbata hanggang sa mga palaboy, samasama sa magulong agos ng mga tao sa kapusurang iyon ng Ermita.

Sumaisip ni Ding ang kanyang problema at ang posibilidad na siya'y mapatapon sa lansangan at maging isang taong grasa.